Home
બિઝનેસ
યુદ્ધના પડઘા અને નબળો રૂપિયો, ડોલર સામે 94.85ની સૌથી નીચી સપાટીએ પહોંચ્યું ભારતીય ચલણ

યુદ્ધના પડઘા અને નબળો રૂપિયો, ડોલર સામે 94.85ની સૌથી નીચી સપાટીએ પહોંચ્યું ભારતીય ચલણ

11:23 PM March 28, 2026 Gujju News Channel

શુક્રવારે ભારતીય રૂપિયો અમેરિકન ડોલર સામે 94.85 ના ઐતિહાસિક નીચલા સ્તરે પહોંચી ગયો છે. કાચા તેલના ભાવ 110 ડોલર પ્રતિ બેરલને પાર કરી જવાથી અને વિદેશી રોકાણકારો (FIIs) દ્વારા ભારતીય શેરબજારમાંથી 4,367 કરોડ રૂપિયા પરત ખેંચી લેવાને કારણે રૂપિયામાં આ મોટી ગાબડું પડ્યું છે.

વિશ્વભરમાં ચાલી રહેલી ભૌગોલિક અને રાજકીય અસ્થિરતાની અસર હવે સીધી ભારતીય ચલણ પર વર્તાવા લાગી છે. શુક્રવારે જ્યારે બજાર ખુલ્યું ત્યારે રૂપિયો 94.18 ના સ્તરે હતો, પરંતુ દિવસભર ડોલરની ભારે માંગ અને અનિશ્ચિતતાને કારણે તે સંભળાઈ શક્યો નહીં અને અંતે 94.85 પર જઈને અટક્યો. આ અગાઉ બુધવારે રૂપિયો 93.96 પર બંધ થયો હતો. નિષ્ણાતોના મતે, રૂપિયામાં આટલો મોટો ઘટાડો થવા પાછળ મુખ્ય ત્રણ કારણો જવાબદાર છે. પ્રથમ, આંતરરાષ્ટ્રીય બજારમાં બ્રિન્ટ ક્રૂડ ઓઈલના ભાવ 2.69% વધીને 110.92 ડોલર પ્રતિ બેરલ પર પહોંચી ગયા છે. ભારત પોતાની તેલની જરૂરિયાતનો મોટો હિસ્સો આયાત કરતો હોવાથી, તેલ મોંઘું થતા ડોલરની માંગ વધી છે અને રૂપિયો નબળો પડ્યો છે.

► વિદેશી રોકાણકારોની ભાગદોડથી શેરબજાર નીચે

બીજું મુખ્ય કારણ વિદેશી રોકાણકારોની ભાગદોડ છે. યુદ્ધના ભય અને વૈશ્વિક મોંઘવારીને કારણે વિદેશી સંસ્થાકીય રોકાણકારોએ શુક્રવારે ભારતીય બજારમાંથી અંદાજે 4,367.30 કરોડ રૂપિયાના શેર વેચીને નાણાં પાછા ખેંચી લીધા છે. આ ઉપરાંત, વિશ્વની છ મુખ્ય કરન્સી સામે ડોલર ઈન્ડેક્સ 99.94 પર પહોંચી ગયો છે, જે દર્શાવે છે કે ડોલર વૈશ્વિક સ્તરે વધુ મજબૂત બની રહ્યો છે. રૂપિયાની આ નબળાઈની અસર શેરબજાર પર પણ જોવા મળી હતી, જ્યાં સેન્સેક્સ 1,690 પોઈન્ટ્સ અને નિફ્ટી 486 પોઈન્ટ્સ તૂટીને 23,000 ની સપાટીની નીચે બંધ થયા હતા.

► આયાત થતી વસ્તુઓ થશે મોંઘી

રૂપિયાના આ ઐતિહાસિક ઘટાડાની સીધી અસર સામાન્ય માણસના ખિસ્સા પર પડવાની છે. ભારત મોબાઈલ, લેપટોપ અને ઈલેક્ટ્રોનિક્સ આઈટમોના મહત્વના ભાગો જેમ કે ચિપ્સ અને કમ્પોનન્ટ્સ વિદેશથી આયાત કરે છે. હવે ડોલર મોંઘો થતા આ વસ્તુઓની આયાત કરવી કંપનીઓ માટે મોંઘી બનશે, જેના કારણે આગામી દિવસોમાં સ્માર્ટફોન અને ગેજેટ્સની કિંમતોમાં વધારો થઈ શકે છે. આ ઉપરાંત, વિદેશમાં અભ્યાસ કરતા વિદ્યાર્થીઓ અને વિદેશ પ્રવાસે જતા પ્રવાસીઓ માટે પણ ડોલરની વધતી કિંમત મોટો આર્થિક ફટકો સાબિત થશે.

►યુદ્ધની સ્થિતિ શાંત નહીં થાય, તો રૂપિયો હજુ નબળો થઈ શકે

નિષ્ણાતો ચેતવણી આપી રહ્યા છે કે જો કાચા તેલના ભાવ કાબૂમાં નહીં આવે અને મધ્ય પૂર્વમાં યુદ્ધની સ્થિતિ શાંત નહીં થાય, તો રૂપિયો હજુ પણ વધુ નબળો પડી શકે છે. હાલમાં 95.00 ની સપાટી રૂપિયા માટે એક મોટો સપોર્ટ ગણાય છે. સરકાર અને આરબીઆઈ (RBI) આ સ્થિતિ પર ચાંપતી નજર રાખી રહ્યા છે અને બજારમાં ડોલરનો પુરવઠો વધારવા માટે હસ્તક્ષેપ કરી શકે છે. પરંતુ વૈશ્વિક અસ્થિરતાને જોતા, હાલમાં ટૂંકા ગાળામાં રૂપિયામાં મોટી રિકવરી આવવાની આશા ઓછી જણાઈ રહી છે.